O le tufatufaina o le faamanuiaga tau tupe e 150 tālā mo le toe a’e o a’oga a fanau lea o loo faatino e komiti o Fono Faavae o le poloketi miliona, ua aiaia ai e nisi o komiti le faato’ā maua o lea seleni pe a mae’a ona lesitala i le lola palota a le itumalo.
O loo faasino tonu lea aiaiga ia i latou na atoa le 21 tausaga e tatau ai ona lesitala i le palota tele o lena tausaga ua mavae, ae e le’i lesitala.
O lea la ua lolofi atu ai le to’atele o i latou sa lē faia a latou lesitala i le ofisa o le komisi o faigāpalota i Mulinuu e lesitala ona o loo fia maua a latou ta’i selau limasefulu tālā.
O le aiaiga foi lea e tasi ua ave ia i latou ua atoa le 21 tausaga, o le faia muamua o le lesitala i le lola palota ona faato’ā agavaa lea i le faamanuiaga tupe mo le toe a’e o a’oga.
O faamaumauga a le ofisa o faigāpalota ina ua tapuni le lesitala o tagata palota mo le palota tele ia Aokuso o le tausaga ua mavae o loo faailoa ai e tusa ma le 15,244 tagata e le’i lesitala ae ua agavaa e avea ma tagata palota o latou itumalo.
