E lē itiiti ifo ma le 30 le aufaipisinisi laiti ua lē maua ni avanoa e faatino ai a latou pisinisi i le maketi fou i Savalalo, o le a faatalitali i se avanoa pe a mae’a ni galuega o le a toe faaleleia ai le maketi i Fugalei.
O le Aso Faraile ua mavae na feiloai sui o pisinisi laiti ua lē maua ni avanoa i le maketi fou i Savalalo ma le ta’ita’i o le malo i le Palemia ma faatalanoa ai o latou atugaluga i le lē maua o ni o latou avanoa, ae sa iai o latou suafa i le lisi o pisinisi e faaaogāina lea maketi pe a tatala.
Ua faailoa e le ta’ita’i o le malo susuga Laaulialemalietoa Leuatea Polataivao Fosi i le polokalame o le Fofola le Fala ma le Palemia, e le’i mae’a le tausaga nei ua mae’a galuega o le a toe faia mo le maketi i Fugalei ma maua ai loa avanoa mo le aufaipisinisi laiti ua lē maua ni avanoa i le maketi fou i Savalalo.
O le taimi nei talu ona taofia pisinisi laiti sa faia i tua ane o le maketi i Savalalo ona o galuega o le nofoaga e tutū ai pasi ma taavale a le atunuu lautele, o le maketi i Fugalei ua siitia iai.
E oo foi i le filī maketi i le taeao o le Aso Sa o Fugalei na siitia iai.
