Ua amata faata’ita’i i luga o auala i Aukilani i le vaiaso nei le pasi fogafalelua ua suia mai le tiso e avea ma pasi e faaaogā ai na o le eletise.
O le pasi lenei sa na o le tolu tausaga le matua i le taimi na toe fau ai e inisinia a le Tranzit i Wairarapa e suia agai i le eletise.
O le tausaga e 2035 lea o loo tulimata’ia e le malo e tatau ona oo atu iai ua suia pasi nei e faaaogā i femalaga’iga lautele, ma o le taunuu manuia o lenei uluai poloketi o se tala fiafia ma o se ata foi ua saga faamausalī ai e mafai lava ona vave ausia lea sini.
E 20 pasi double deckers o loo feoa’i i Aukilani ma mai le Tranzit o loo iai lona faamoemoe ia mafai ona faia uma suiga i totonu o le lua tausaga.
E i luga laititi o le $400,000 le tau e suia ai le pasi fogafalelua mai le tiso i le na o le eletise.
