Ua iai nisi ua faaseā ma faailoa le lē fiafia i le faaiuga a le faigamalo a Kuiniselani ua faaaoga ai le nofoaga o le Sea World Resort e ave iai isi gasegase ona o le tumu o le falemai lautele.
O le lipoti mai Queensland ua faailoa ai lea tulaga ma o se faaiuga e le taliagofie e le tele o aiga o ia gasegase aemaise tagata lautele.
O loo lipotia e le 9News o gasegase e le manaomia fesoasoani faavavave ua faasoa ane i le resort lea ma e faapea e 24 potu o le resort lea ua faaagaga mo lea faamoemoe.
O faitioga ua ta’ua ai e lē tutusa moega o loo faaaoga i le resort ma moega a le falemai e talafeagai mo le faafaigofie i gasegase aemaise lava nai tagata matutua.
Fai mai nisi e talafeagai le resort e toomaga iai gasegase o loo fia maua se nofoaga filemu.
O se tasi mataupu na lotea i le fonotaga a le Palemene i le vaiaso nei e aofia ai tulaga o taotoga mo gasegase ma le uumi o taimi e faatali ai nisi mo o latou togafitiga.
