Ua faailoa e le Ofisa Sili o le Matagaluega o Aoga Taaloga ma Aganuu afioga Afamasaga Dr. Karoline Afamasaga- Fuata’i ua faaleaogaina e le Kapeneta le faaauauina o lana konekarate. 

O le amataga o le vaiaso i le Aso Gafua 21 o Fepuari 2022 na fai ai se feiloaiga a Afamasaga ma Ofisa Faasalalau  i Malifa e faailoa ai lea tulaga i le faamuta faafuasei ai o lana konekarate ma o lona aso mulimuli i le galuega o le Aso Gafua lava lea. 

Taua e Afamasaga “Sa oo mai ia te a’u le FK mai le Kapeneta (Cabinet Directive i le Aso 22 o Tesema 2021 e faailoa mai ai o le a toe faaopoopo la’u konekarate (contract extension) o lea la sa o’u galue lava i le faaaopoopoga lea ua tuuina mai amata atu i le Aso 9 o Fepuari tausaga nei peitai lea ua toe oo mai le isi FK e faaleaogaina ai loa le FK na tuuina muamua mai”. 

E pei ona silafia o se fenumia’i i faasilasilaga mai le Matagaluega o Aoga i le lua vaiaso talu ai lea na tele ina fesiligia ai e le toatele galuega a lea matagaluega aemaise lava o le Ofisa Sili. O lea fenumia’i o le maea ona faasilasila e le Palemia le toe a’e o aoga i le Aso 14 o Fepuari i le maea ai o le vavao na iai Samoa ae sau le faasilasilaga a le Ofisa o Aoga e faapea e tapunia pea aoga mulimuli ane toe faasa’o mai. 

O lea fesasia’i e le’i logomalie i le taitaifono o le Faatuatua o le Atua Samoa ua Tasi ma na ia fautuaina ai le Ofisa Sili ina ia faamavae pe a le usitaia Tulafono e avatu e le malo fou. 

Na faamalamalama e Afamasaga tulaga na tulai i le aso o le faasilasilaga e faapea “Na taulimaina e le Matagaluega le FK mai le Kapeneta ae le’i taina le itula e tolu i le afiafi e faapea o le a toe faaauau le iai o Samoa i vavao mo puipuiga, sa tapena ai loa le faasilasilaga mo aoga a le fanau e faapea e tapunia pea mo le 2 vaiaso peitai faatoa latou iloa mulimuli ua iai seisi FK fou i lea lava aso ma na ia vili loa i le Ofisa o le Palemia mo se faamaoniaga o le FK fou. E ui e le’i umi ona i luga le faasilasilaga muamua ae na toe galulue le ofisa e faasa’o ma e leai lava ma seisi mafuaaga i tua atu o le gaioiga sa fai.” 

E ui i lea o le faaiuga o konekarate e sau tasi lea mai le Kapeneta ma e pule le kapeneta i le taimi e faamuta ai pe faaleaogaina. 

Taua foi e Afamasaga “Ou te iloa sa o’u galue i le malosi e tatau ona galue ai ma oute alu ese ma lo’u agaga maualalo mai le tautua sa ofoina atu i le Matagaluega.”