O le faai’uga o le masina na te’a nei o Ianuari sa tatau ona mae’a ai le faamatuuina atu i Fono Faavae a itumalo palota o vaegatupe o le miliona tala lona lua, peitai ua faailoa e le Minisita o Tupe i se pepa o faamatalaga o le vaiaso na te’a nei e 5 miliona tala na faamatuuina atu mo vaegatupe o le miliona lona lua ma le miliona lona tolu ma le faamoemoe e faamatuu isi vaega tupe i le taimi e taunuu atu ai lipoti o le su’eina o tusi ma fuafuaga e faatino i le miliona tala lona tolu.

Ua faailoa foi e le Minisita o Tupe le afioga Lautimuia Afoa Uelese Vaai, o le tausaga nei ua suia ai i le lua tufatufaga mo le miliona lona tolu o se suiga e vave ai ona maua e Fono Faavae vaegatupe e faatino ai atina’e o lea poloketi a le malo.

O se feiloa’iga ma le Minisita fou ua vaaia le Matagaluega o Tina ma Tamaitai Atina’e o Afioaga ma Agafesootai o loo vaaia le poloketi lenei, ua ia faamaonia mai ai le iai o ni suiga i le suia o le Komiti Faatonu o le poloketi o le miliona lea ua na o ia ma le Minisita o Tupe a o isi sui o le Ofisa Sili o le matagaluega ma i latou o loo feagai ma le faatinoina o le poloketi.

O se suiga ua aveesea ai Minisita e to’atolu o le Kapeneta sa avea ma sui o le Komiti Faafoe poo le Steering Committee.