Ua valu masina o nofo faatali pea le afioga Maualaivao Pat Ah Him i se faaaliga atu a le matagaluega o leoleo, poo afea e faia ai ni moliaga i lana tagi o tuua’iga o le taumafai e taofi le faia o le amiotonu, sa ia tuua’ia ai  lē sa avea ma Komesina o Leoleo, o lē sa avea ma Loia Sili, ma lē sa avea ma Palemia o le atunuu.

O Novema o le tausaga na te’a nei na faaalia e lea tamalii sa faato’ai ai le tagi i leoleo, peitai e oo mai i le taimi nei e le’i logoina lava o ia poo fea ua agai iai lana mataupu. Sa maua se feiloa’iga i le Komesina o Leoleo le susuga Auapaau Logoitino Filipo ma fesiligia i le mataupu, ae sa ia faailoa mai o le fautuaga a lē sa avea ma Loia Sili i le faila o su’esu’ega na ave iai mo se fautuaga faaletulafono, e lē lava mau e faia ai ni moliaga.

Na toe asia le ofisa o leoleo e lea tamalii talu ai nei ma tuliloa pea se taunuuga o lana tagi, ma faaalia ai e Auapaau sa toe ave le faila lava lea o su’esu’ega i le Loia Sili ua iai nei, ae o le fautuaga foi lea e tasi. Sa maua se feiloa’iga i le afioga Maualaivao Pat Ah Him ma faailoa iai lea tulaga, ae sa ia faailoa mai sa ia savalia foi le Loia Sili ae o le faamatalaga na tuuina atu, sa lē tatau i leoleo ona avatu le faila ona o le latou pitolaau lea o le faia o su’esu’ega ma silasila i maua e avanoa ai ni moliaga ia i latou o loo tuua’ia.