Ua faaleaoga e le Faamasinoga Faaitumalo moliaga taitasi o le faia o ni gaioiga faaalatua solitulafono poo le bribery sa tuuaia ai le afioga i le Palemia Fiame Naomi Mataafa ma le Minisita o Faatoaga ma Faigafaiva Laauli Leuatea Polataivao Fosi ina ua talia le talosaga a le loia a le itu tagi na faauluina ia moliaga o ia lea o Elikapo Peni ina ia toe ave i tua le mataupu.
O le Aso Lua o le vaiaso nei na valaau ai le talosaga lenei ma faapena ona faaui ai i tua, o le Aso Gafua na valaau ai foi moliaga o le Minisita o Pisinisi Alamanuia le Leipa ia Leatinuu Wayne Sooialo ua faaleaoga uma ai moliaga e 13 ma toe faaui ai i tua.
Ua taoto mai la ua leai nisi mataupu tau faamasinoga ua toe feagai ma sui faipule i le vaega faaupufai a le Faatuatua i le Atua Samoa ia Tasi seia vagana moliaga o le faalēmigao o le faamasinoga lea na faaulu e lea vaega faaupufai e faasaga i sui faipule o le vaega e Puipuia Aiā Tatau a tagata e aofia ai le latou taitai ma o le a suesueina e le Faamasinoga Sili i le faaiuga o le masina nei.
O tagi e lua o tuuaiga o faatosina solitulafono mafua mai i palota ia Novema o le tausaga na te’a nei o le ogatotonu o lenei vaiaso e toe valaau ai mo le aloaia faaletulafono o le toe faaui ai tua o ia mataupu.
