O le tala mulimuli e taualuga ai le faatafiti o le galuega o lenei vaiaso, o le Aso Tofi lenei ua faia ai le faaaliga o taavale teuteuina e faailoga ai le Iupeli Auro poo le 50 tausaga o le Faalapotopotoga o le Faaputugatupe o le Lumanai Manuia o Tagata le NPF.

O se tasi lea o polokalame o le faailogaina o le 50 tausaga talu ona faavae mai lea faalapotopotoga tau faaputugatupe a le Malo, i le tuanai o le Aso Faraile ua mavae na faia ai le sauniga lotu faafetai a le NPF. O le faaaliga o taavale teuteuina ua togi taavale e mau tulaga i le teuina faamatagofie ma ia momoli mai ai le talafaasolopito o le NPF, aemaise o se fe’au tāua e faailoa ai lona aogā i tagata o le atunuu.