O se tasi o saunoaga talu ai nei a le ta’ita’i o le Itu agai ma le autusitala na ia ta’ua ai, ailoga e faigofie le fuafuaga ua agai nei i ai le malo, i le faia o se forensic auditing poo se su’esu’ega faapitoa i galuega tetele na faatino e le faigamalo talu ai, aemaise o tupe sa faaalu i nei galuega tetele pe na sa’o ma lelei ona faaaogā.
E manatu le ta’ita’i o le Itu agai, ailoga e faigofie ona toe maua mai ni faamaumauga o na galuega mo nei su’esu’ega faapitoa, auā ua silia ma le 40 tausaga talu ai. Peitai ina ua fesiligia e le sui o le Radio Samoa le afioga i le Sui Palemia i lea manatu, saunoa Tuala, e sa’o ua 40 tausaga, ae o loo iai foi nisi poloketi o loo faaauau pea ona fai i le taimi nei pe e lei leva atu foi ona faatino nisi galuega, lona uiga, e lē tatau ona faapea ua leai ni faamaumauga o nei galuega.
Saunoa atili Tuala, o su’esu’ega nei, e iai lava auala ma metotia faapitoa a i latou o le a faatinoina forensic auditing e mafai ai lava ona latou faatino ma su’e uma faamaumauga o galuega sa fai. Auā e mulia’i saili mafuaaga ma mea na tutupu, ae muamua lava tāpā faaamaumauga poo records.
O le tulaga o le faaleagaina o records e i latou e ono faia lea gaioiga, na toe faamamafa mai lava e Tuala, o se solitulafono lena mea, ma e lē tatau ona taumafai se tasi e faatino. Saunoa Tuala, e laititi le 40 tausaga ae o su’esu’ega faapea e mafai lava ona oo atu i tuā i le 50 tausaga talu ai. Ae o nei manatu ua amata ona lagalagā mai e i latou sa aafia ai nei galuega, na ta’ua e Tuala, o uiga lava nei e pei e tetee mai i le faia o lenei su’esu’ega ae o se fuafuaga e tatau ona faatino.
