Ua poloka lē tumau e se tasi o faamasino i le malo tele o Amerika se poloa’iga mai le alii Peresetene ina ia suia aiātatau tau sitiseni a tagata lea o loo faamauina i le faavae o le atunuu.
Fai mai le BBC o le faamatalaga a le faamasino lea, o le poloa’iga lea ua fuafua e faamamalu aloa’ia i le masina fou, ua soli faavae tele.
I isi lipoti mai Amerika lava ua faailoa ai ua tagofia e Trump faila e faatatau i le maliliu o le Peresetene o John F Kennedy aemaise Robert Kennedy ma Martin Luther King Jr ma ua faamagalo nisi o tagata e tetee i le faapa’ūina o ma’itaga ma sainia foi nisi poloa’iga e faatatau i le cryptocurrency ma le AI, poo le artificial intelligence, le atamai faaonaponei faaaogā ai komepiuta ma tekonolosi.
O nisi lipoti ua ta’ua ai se faamatalaga ua faia a Trump o Kanata e ono avea ma Setete o le malo tele ma e lē mana’omia e Amerika taavale ma laupapa mai Kanata.
O le amataga foi o le vaiaso nei na lipotia ai le faatonuina o le Matagaluega a le setete State Department ina ia taofia le tumau talosaga mo tusifolau o loo iai le mata’itusi X i le vaega o loo faamautinoa ai poo se alii poo se tamaitai o loo talosaga.
E tele suiga ua feagai ma tagata i le malo tele i le taimi nei i lalo o le latou Peresetene fou.
Puna o Faamatalaga: https://www.bbc.com/news/live/cn0y51z7wedt
