E to’a 8 sui o le pasese mai le malaga faapitoa (repatriation flight) mai Niu Sila na taunuu atu i Samoa i le Aso Sa na te’a nei ua faamaonia le aafia i le Koviti19.
Faamaonia lea tulaga e le Taitaifono o le Komiti o Faalavelave Faafuasei le NEOC afioga Agafili Shem Leo ina ua fesiligia e le Samoa Observer.
E le’i faailoa tele e Agafili tulaga auiliili o le mataupu peitai na ia taua o le a faailoa i se taimi o i luma i se pepa o faamatalaga (press release) a le NEOC nisi faamatalaga faatatau i tagata ua aafia.
E le’o mautinoa poo fea o faanofoesea ai i latou nei ua aafia pe o loo i le nofoaga faapitoa i Motootua pe o loo faanofoesea i le falemai i Faleolo. O le malaga mulimuli mai Niu Sila ae le’i taunuu mai le malaga fou lea sa taunuu atu i Samoa i le 3 vaiaso talu ai ma e to’a 270 le pasese. O i latou uma ia e leai seisi na faamaonia na maua i le faama’i.
Peitai o le malaga fou lea na taunuu i le aso ananafi mai Niu Sila lea ua maua ai le to’a 8 ua aafia i le vairusi.
