O le taeao nei na faamatuu faalaua’itele mai ai i tua le lipoti a le foma’i e faia ta’otoga i maliu lilo poo le coroner o loo ta’ua ai, o le faalavelave mata’utia tau taavale lea na maliliu ai ni alii Samoa se to’atolu, ma oo ai le ogaoga o mafatiaga i o latou aiga i Niu Sila nei faapea i Samoa, o se faalavelave sa tatau ona mafai ona ‘alofia, pe ana faapea sa fausia lelei papuipui ia e vaelua ai le ogatotonu o le aualatele e tusa ai ma faatutulagaga mo le puipuiga saogalemū.
Na ta’ua atili e Coroner Alison Mills i lana lipoti lea, e na te fautuaina le tatau ia latou o loo iai i pulega o matāupu tau i auala, ona ave le latou faamuamua i le toe suia uma o papuipui ia o loo iai i auala sasa’o, o pa lava nei na faia mai i le vaitau o le 1990 ae ua tatau ona suia i ituaiga papuipui ua iai faaonaponei.
O lana lipoti lea mai ana su’esu’ega i maliu o nai alii Samoa, o Leauga Jerry Leauga, 37, Faaofo Uili Faaofo, 45, ma Taavao Kelemete, 32 tausaga le matutua o soifua.
O i latou uma nei o ni tama tane e auaiga uma, na maliliu ina ua faafuase’i ona tifa atu se loli mai le isi itu o le auala ma lavevea ai le latou van na aga’i mai ai i Aukilani, ae tupu ai loa lea faalavelave mata’utia i le State Highway 1 i le va o Bombay ma Ramarama, i Aukilani ia Aokuso, 26, 2024.
E tele isi taavale na aafia uma ai i lenei faalavelave ae o le loli lea na tifa atu ma soso’a ai le itu o le van sa malaga mai ai nei alii e faamoemoe e faamautu mai i so latou aiga i luga i Aukilani, ma tapena ai le latou malaga e toe foi atu i Samoa, i le mae’a ai o taimi sa galulue ai i galuega faavaitaimi i Niu Sila nei.
