O le faaauauina o galuega o le atina’e manuia o le atunuu o loo faatino e le malo e ala mai i le auaunaga a le pulega o le suāvai, ua faailoa ai le mae’a o se tasi o galuega o le suāvai mo le afio’aga o Papa i Sataua.

E 255 afe 874 tala le tau o tanevai tetele e lua e mafai ona teu ai le 10 afe lita o le suāvai, o le faata’otoina o laina ofe paipa e 200 mita le uumi, ma le faapipiiina o le pamuvai e ola i le eletise e maua mai le la o galuega ia ua mae’a ma ua mafai ai nei ona maua le suāvai i lea vaega o le tatou motu i Savaii.

Sa galulue le pulega o le suāvai i le faatinoina o lea galuega faatasi ai ma le lagolago o nisi o ana paaga e pei o le kamupani konesale o le Vision Engineering i le fausiaina o tanevai tetele e lua lea ua teu iai le suāvai.