E lei mamao atu ni masina na faalauiloa ai e le Minisita ma le Matagaluega o Faatoaga ma Faigafaiva mailei puaa ua fausia e se kamupani i Amerika, i le faamoemoe o se auala sili lea ona faaaogā e maua ai se fesoasoani i le faatama’ia o faatoaga i lo tatou atunuu e meaituaolo taaloa.
O lea la ua taunuu mailei e 12 ma le isi sefulu e taunuu i se taimi o Iuni.
Ua agalelei Malo o Niu Sila ma Ausetalia e faatupe le aumaia o ia mailei, ma ua tufatufa ai le 12 muamua i itumalo e ono i Upolu lea o le a muamua maua e itumalo o Falelatai ma Samatau, Siumu, Lefaga ma Faleaseela, Safata i Sasa’e ma Safata i Sisifo, Anoamaa i Sasae ma Anoamaa i Sisifo ma Falealii i Sasae ma Falealili i Sisifo.
I le tufatufaina o ia mailei na faailoa ai e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, o le faatama’ia o faatoaga a le atunuu i manu taaloa e faasino i meaituaolo, o se faafitauli ua leva ae ua iai le talitonuga o le matagaluega o le a maua se fofo mo le aufaifaatoaga ia latou meatoto.
O nei mailei puaa ua muai tuuina atu mo itumalo e ono i Upolu a o tālia ai le tuuina atu o mailei muamua mo itumalo i Savaii.
