Ua lapata’i mai se tagata e tele lona silafia i tulaga tau le puipuiga i leoleo a Niu Sila e ao ona silasila ma le toto’a i se lapata’iga mai se tasi o leoleo maualuga a Ausetalia ua ta’ua ai se faamatalaga e aofia ai nisi o faigamalo i atunuu i fafo o loo galulue faatasi ma kulupu latou te faatulagaina lelei soligatulafono poo organised crime groups. 

Lipotia e le RNZ se faamatalaga a le Customs e tele kegi i Niu Sila ua iai sootaga faavaomalo ma o le fonotaga a le Five Eyes i le masina talu ai na saunoa ai le komesina o leoleo a Ausetalia ua faaopoopo pea le tele o soligatulafono e tulai mai. 

Ta’ua i le lipoti mai le va o le 2014 ma Setema 2020 e 5,887 auupega o fana, 11,265 vaega o fana ma le 220,063 o isi auupega na maua i tuaoi o le atunuu. Ua faailoa foi i le lipoti ua sana faamalosia nei le galulue faapaaga o leoleo a Niu Sila ma Ausetalia ma isi foi atunuu e faafetauia le tele tele o le mau solitulafono o loo su’esu’eina pea i le taimi nei.