Ua talia e le faamasinoga le talosaga a loia a leoleo e toe tolo le tuuina atu o se tali a lē o loo molia i le solitulafono o le faaoo o le maliu i se tamā ma lona atalii i le faalavelave na tulai mai i Fogapoa i Savaii i le masina na te’a nei.
O le amataga o lenei vaiaso na valaau ai mo le taimi muamua lea moliaga tau solitulafono ma ua toe tolo atu ai i le Aso Gafua 25 o Iulai e tatau ona oo atu iai ua mautu moliaga a leoleo ma ua mae’a foi a latou su’esu’ega.
Mo le taimi nei o loo nofo taofia pea i le vaaiga a leoleo le tamāe 50 ma ona tupu tausaga o le soifua o loo molia. O le faalavelave lenei na faaalia e leoleo na mafua i se feeseesea’iga i se fanua ma o loo masalomia ai le faaaogā e le tamā o loo molia o se laau malosi sa ia faatino ai le solitulafono.
