Fai mai leoleo o le aualii e toalua lea na feta’ua’ina lo la faaleagaina o ni vaega o masini faailo i le nofoaga o trains i Sini i le po o le Aso Lulu, e lei agai a la faiga i le aumatamata i le taaloga.
O le tapunia o le auaunaga a trains na poloka ai ma le faitau afe o tagata na agai atu e maimoaina le taaloga a Ausetalia ma Egelani i le semi finals o le soka i le Olympic Park.
Na faatoese ai le Premier o Niu Sa Uelese, Chris Minns ona o lea faaletonu ma ia ta’ua e lē o se faaletonu o le system ma e iai le mafuaaga na tapunia ai ae e leai foi se alofaga mai le faaletonu na alia’e mai.
O le faamatalaga a leoleo na valaau ane i latou i le station i Ashfield poo le ta o le 11 ona o lipoti ua iai vaega ua faaleagaina.
E 47 tausaga o le isi alii na pueina ai i se nofoaga e lata ane ma le isi e 33 tausaga na pue i se taimi mulimuli ane ma ua molia uma i le faaleagaina o meatotino ma le tuuina o soifua o tagata i se tulaga lē saogalemu.
Na teena le talosaga mo le tatala i tua ma na tutulai i le faamasinoga i le aso ananafi.
