E ui i le taugata o fale mautotogi i le taimi nei i le atunuu e pei ona iai foi i le tele o vaega o le lalolagi peitai ua iai lipoti ua agiga i le asō ua ta’ua ai o loo atagia mai le ono iai o se faamāmā avega i lea tulaga i se taimi e lē o toe mamao.

Ua faailoa o Sini lea ua faamauina o le aai aupito taugata lea ua iai nei o Ausetalia mo fale mautotogi.

Mo le taimi nei i Sini o le tau ua iai fale mautotogi i le vaiaso pe ā ma le 700 mo le faletasi ma le 670 mo se unit ae fai mai i latou e tele tomai i auaunaga tau fale, ua lemu le alu a le maketi i le taimi nei pe a faatusa i se taimi e lei mamao atu ma atonu o se tala fiafia lea mo le au saili fale mautotogi ona e foliga o le a faasolo ina faaitiita mai le tau o fale i le mae’a o le tolu tausaga o siitia pea.