Ua tauaao e le Pule sili o le Iunivesite Aoao a Samoa le foa’i tupe e sefulu afe tala Niu Sila mai sui o le asosi o Tama ma Teine tuai o le Kolisi o Vaipouli o loo pāpāaao i Niu Sila.
Ua faailoa mai e le ofisa sooupu o le Malo le tauaao atu e le tamaitai Palemia le afioga Fiame Naomi Mata’afa o lea foa’i i le Pule Sili, i le faamoemoe o le asosi e fesoasoani i fuafuaga a le Iunivesite auā ni avanoa sikolasipi mo le a’oa’oina o alo ma fanau a le atunuu i le lālā o le Iunivesite i Salelologa i le motu tele i Salafai.
O le malaga atu i Niu Sila talu ai nei a le ta’ita’i o le Malo na tauaao ane ai e sui o le asosi lea seleni i le faamoemoe e faaoo atu e le afioga i le Palemia i le pulega o le Iunivesite aoao a Samoa.
Ua faafetaia ai e le Pule Sili ma le iunivesite a le atunuu le foai a tama ma teine tuai o le kolisi o Vaipouli i Niu Sila, ona ua silafia e le pulega e lē o toe faigofie nei taimi i le sailiga o seleni ona ua siitia le tau o le soifuaga ae e lē mafai lava le susu’e pea o le faamalama o le Isaraelu moni ma silasila mai i alo ma fanau a le atunuu ia maua se fesoasoani mo mātua i le faatupeina o a’oa’oga.
