Ua laualuga nei i tapenaga a le faia’oga ma le pulega o le tatou aulakapi o le Manu Samoa, se ‘ai lelei mo le tapua’iga a le atunuu, a o tapena ai i lana taaloga mulimuli o le Ipu o le Pasefika o le a fetaui ai ma Fiti, i le tuanai o ana taaloga muamua ua faai’uina ma le manumalo.
O tama na fili mai le ‘au a le Moana Pasefika ma nisi o alo ma fanau ua filifilia o se mitamitaga lea i le faia’ogaulu le afioga Vaovasamanaia Seilala Maposua ona o le maualuga o le tulaga o loo iai lo latou malosi le fitness, aemaise ua lua taaloga ua mae’a e leai ni manu’aga tuga o aafia ai tama o le ‘au.
O se tasi itu lelei o lana tapenaga e pei ona faailoa mai e le faiaogaulu, o le maualuga o le tomai o le pulega i faiaoga lagolago o loo feagai ma toleniga ma fautuaga i auala e faatino ai gaioiga uma ina ia ausia le manumalo.
Se faatalanoaga ma le Faiaogaulu o le Manu Samoa le afioga Vaovasamanaia Seilala Maposua. O le Aso Toonai nei le taaloga mulimuli a le tatou ‘au o le a feiloa’i ai ma Fiti.
