O le faaitu i Sisifo o Sini o loo feta’uaina e aumau ai tagata e to’afā ua molia nei e leoleo i le mataupu e aofia ai faiga taufaasese i le National Disability Insurance Scheme poo le NDIS ma e silia ma le 2 miliona o loo aofia ai. 

Fai mai le 9News na faia su’esu’ega ma osofaiga i nofoaga e fā i le itu i Sisifo o Sini ma maua ai i latou ia e to’afā e leoleo a le Feterale a Ausetalia. Fai mai le NDIS o le kulupu lea o loo feta’uaina e iai sootaga i le ‘au solitulafono mai Sasae tutotonu, Middle Eastern organised crime group. 

O le to’atolu o i latou ia e aofia ai tamaitai e to’alua ma le alii e 27 tausaga o loo feta’uaina e faigaluega i se auaunaga mo le tausia o i latou e iai mana’oga tumau. Ua molia i le maua o tupe i ni auala taufaasese ae lei ofoina ni auaunaga. O ananafi na tūtūlai ai i le faamasinoga.  

O le isi tagata e atoa iai le to’afā e 62 tausaga le matua ua molia foi i le mataupu lava lea ma o le asō e tulai ai i le faamasinoga.