Ua sauni le Minisita o le Matagaluega o A’oga Taaloga ma Aganuu le afioga Seuula Ioane e tali i ni tuua’iga na faailoa talu ai nei e le ta’ita’i o le Itu Agai, faasaga i le fuafuaga a le Malo e tuuina atu le galuega o le faaooina atu o fesoota’iga televavave tau initaneti mo a’oga i le atunuu, i le kamupani o le Blue Wave, e pei ona faatatauina ai se vaega tupe e 2 miliona tala i le tala autu lona lua o le tupe ua pasia e le Palemene.
O le kamupani o le Blue Wave sa igoa muamua o le NetVo sa latou faaoo atu fesoota’iga initaneti i nisi o a’oga i Savaii i se auaunaga e faaaoga ai fesoota’iga tau satelite. O lea galuega sa galulue faatasi ai ma le vaega faaupufai ua avea nei ma faigamalo a o lumanai le palota tele i le tausaga na te’a nei.
Ua faaailoa mai o le tali a le Minisita o A’oga Taaloga ma Aganuu o le a faamalamalama ai le mataupu i mafuaaga o le tuuina atu o le galuega i lea kamupani tau fesoota’iga. Ua taloina e le Minisita se feiloa’iga ma le vasega o tusitala e faailoa ai sona finagalo mo le silafia ai e le atunuu o le faai’uga a le Malo.
