E uigaese lagona na oo ane i finagalo o soo se Samoa i lea aso. Pe na iai totino i le malae i Tiafau, pe na maimoa atu i luga o auala o fesootaiga faaonaponei, ae mautinoa e leai se Samoa e le’i oo ifo i ona lagona le mitamita ae o ni lagona foi e ootia pe a toe tepa i tua i le amataga mai o lenei folauga, aemaise pe a toe tomanatu i nai tuaa na latou tauasa maia fita ma faigata o le sailiga o se sa’olotoga o Samoa, ina ia tuto’atasi lava a latou pulega faafaigamalo, ia lē toe iai i lalo o pulega a malo tetele sa nofo pologa ai. 

E tulaga ese foi le faailogaina o le aso o le Sa’olotoga o Samoa i lenei tausaga. Ua manino uma mafuaaga e pei ona sa otooto mai e le afioga i le Tamaitai Palemia, Hon Fiame Naomi Mata’afa i lana folasaga faalauaitele sa faailoa ai le polokalame ua faataatia e le komiti o tapenaga aemaise le faigamalo. 

Atonu o le vala pito mati’e lava le tulaga ese ai o lenei aso, ona o se Tuto’atasi muamua lenei, ua faailogaina i lalo o le ta’ita’iga a se uluai Palemia Tamaitai ua tulai mai nei e faatonufolauina le sa o le faigamalo a Samoa. Ma ona o lea matati’a mauagata, na tasi ai le finagalo o le komiti ina ia lafo le faaaloalo maualuga, i lana Afioga i le Tamaitai Palemia, Hon Fiame Naomi Mata’afa, na te sisi a’e ai le tagavai o le Malo Tuto’atasi o Samoa i le taeao segisegi o le Aso Lulu, aso 1 Iuni 2022, na faamanatuina ai le 60 tausaga talu ona faalupe le Malo Tuto’atasi o Samoa. 

O le faatino ai e le uluai Palemia tamaitai o lenei faaaloaloga tāua, ua toe lalafo ai mafaufau o tagata aemaise i latou sa soifua ane pe na maua faamatalaga o le uluai tuto’atasi o Samoa, auā o le tuaa lava o le Tamaitai Palemia, le afioga Mata’afa Fiame Faumuina Mulinuu II, o ia foi o le uluai Palemia o Samoa talu ona tuto’atasi, o lona tuaa lava lea na tuuina ifo i lalo le fu’a ina ua faamae’a taualumaga uma o lena aso tāua, ae o lenei ua toe sisiina a’e e lona alo le uluai Palemia tamaitai, i le atoa ai o le 60 tausaga o lena lava tuto’atasi. 

O se isi o vaaiga matagofie sa le’i misi i le silasila a tagata i lea aso tāua, o le auai uma o afioga i Tama Aiga i le maota sa afifio ai le mamalu o malo faaaloalo o lena aso fiafia. E ese mai lana afioga i le Tama Aiga, le Ao Mamalu o le Malo, Afioga Tuimalealiifano Vaaleto’a Sualauvi II, ae sa afifio foi afioga Tama Aiga, le Susuga i le Malietoa Moli ma le Afioga i le Tuiatua Tamasese Efi. O se vaaiga ua leva ona misi mai le tele o faamanatuga o lenei aso faitaulia i le talafaasolopito o Samoa, ae maeu se vaaiga matagofie i lea aso ina ua nofoia mai nofoalii o tama aiga o le atunuu. 

E pei ona iai le suiga i lenei tuto’atasi ua leai ni ausavali a aoga, faalapotopotoga, matagaluega ma soo se asosi e pei ona masani ai. Peitai a o faagasolo le aso atoa, sa mafai ona maimoaina i luga o auala o fesoota’iga televavave le naunau o le tele o afioaga ma itumalo e faatino a latou lava faamanatuga ma sisi a’e ai a latou fu’a; o nisi sa fai a latou faigalotu e lē gata i malumalu ae o fafo i malae o afioaga. O se vaaiga mata’ina foi le lafo e nisi afioaga o le latou faaaloalo i nai o latou tuaa sinasina, o toe ulutaia o afioaga ma itumalo, e sisi a’e a latou fu’a o latou faamanatuga. 

Ma e pei ona silafia o le fuafuaga o le faamanatuina o le atoaga o le 60 Tausaga o le Iupeli Taimane o le Tuto’atasi o Samoa, e faaauau mo le tausaga atoa, e amata atu i le aso 1 Iuni seia muta mai le aso 31 Me i le tausaga fou 2023. Ma ua valaau aloaia atu foi le Komiti o tapenaga ma le faigamalo i itumalo uma e 51 o le atunuu, ina ia faailoa ane i le Komiti a latou fuafuaga uma o loo faataatia mo ni a latou aso faapitoa o le a a faamanatu a o faagasolo le tausaga, ina ia faamauina i totonu o le kalena faaletausaga a le malo mo le faamanatuina o lenei Iupeli Taimane; ina ia faatulaga ai foi le auai atu o le malo e patipatia faatasi fuafuaga a nei itumalo i soo se aso o le a faatino ai. 

Manuia tele le faamanatuina o le 60 Tausaga o le Iupeli Taimane o lou Malo Tuto’atasi Samoa!!