E to’a 10 talavou ua pu’eina e leoleo i le taeao analeila ona o tuliga na faia ma leoleo lea o loo feta’uaina fai mai e oo atu i le 170 km i le itula le saosaoa o taavale na aofia ai.

O le tuliga ma leoleo na amata mai ina ua vaaia e leoleo se taavale o le Volkswagen Tiguan ma le isi taavale o le BMW e gaoia uma ma o le pitonuu o Richmond i Melepone na tupu ai e amata mai le toe kuata i le tasi i le vaveao analeila taimi Ausetalia.

Mulimuli ane na pu’e uma e leoleo i latou sa i totonu o ia taavale ina ua maua lelei i White St i Parkdale ma na maua uma lava le to’a 10 lea e leoleo i se taimi mulimuli ane ma ua toe tatala i tua a o faia su’esu’ega a leoleo.

O le isi faalavelave tau taavale o loo pisi ai foi leoleo mai Adelaide o le su’esu’ega lea o le mafuaaga o se faalavelave tele i le South Eastern Freeway i Adelaide fai mai e to’aiva tagata o loo manunu’a ai ma e iva foi taavale na aofia ai o se pasi ma se isi taavale ma na feto’ai ma lavevea uma atu ai ma isi taavale e fitu.