E afe tala Ausetalia ua ofoina e le pule o se tasi o fale’aiga a le McDonalds i le pitonuu o Chatswood i Sini mo se tagata e faigaluega i le latou fale’aiga pe afai e talosaga atu ma faamanuiaina.
Fai mai le 7News e fai si to’atele o tagata faigaluega ua lolofi atu i lea faamanuiaga ma talosaga ai i avanoa i le McDonalds lea ma ua faailoa foi i le lipoti ua silia ma le 10 le aufaigaluega fou ua galulue ai nei talu ona faasalalau mai le ponesi lea e afe tala mo tagata faigaluega fou.
E lē o faleaiga uma o le McDonalds ae na o le fale’aiga i Chatswood e tu tonu i tafatafa o le train station i lea pitonuu ma e tumutumu ai foi tagata.
Ua mafua ona faia le ponesi lea ona o le faaauau pea ona lē lava le aufaigaluega mo le taimi nei.
