E na o le 20 tausaga o se talavou o loo feta’uaina i lipoti e i’u ina soloatoa i le falepuipui ona o loo feta’uaina o ia lea na faaoolima i se tasi alii talavou lea na maua lona tino maliu i se nofoaga o nofoaafi i Brisbane e pei ona lipotia atu ananafi. 

O le asō ua alia’e ai videos na pu’eina e nisi i le taimi o le vevesi na aafia ai Lauie Michael Tagaloa e pei ona lipotia mai e le Alaata7 a Ausetalia ma ua ta’ua ua molia ai nei le 20 tausaga lea i le fasioti tagata.  

O faasalaga o moliaga faapea pe a faamaonia e oo atu i le soloatoa i le falepuipui pe lē mafai foi ona talosaga i le palola seia mae’a ona tuli le20 tausaga o le faasalaga i Kuiniselani. 

Ua faailoa o le asō e tulai ai lē ua molia i le faamasinoga ae ua lipotia foi le solo atu o alofaaga ma faamaisega mo le aiga o si alii ua ma’umau lona soifua i lenei faalavelave.  

Fai mai le lipoti o nisi na iai faatasi ma lē ua aafia i le taimi lea sa taumafai e fai galuega laveai peitai e lei manuia. O isi alii e to’atolu e pei ona feta’uaina sa sosola ese mai le nofoaga na tupu ai le faalavelave ae na toe maua lava mulimuli ane.