E lē fesiligia o le a sasaa i le tamaoaiga o Samoa ni miliona o tupe a’o tau fonofono faaletonu o le atiina a’e o tagata tafafao i aafiaga o le faama’i koviti 19, pe a faataunuu i le masina fou o Aukuso e oo i le masina o Setema le pu’eina o se vaega o le polokalame faasolo i luga o se fale televise i Ausetalia, lea e silafia e le to’atele i le igoa o le Survivor Australia.
O le taimi nei e lē o faailoaina le nofoaga tonu i le motu o Upolu o le a pu’eina ai lea polokalame tau ata faasolo i luga o televise, ae o loo sailia nei e se kamupani pu’eata i Samoa o loo galulue ma le kamupani televise i Ausetalia o loo puleaina tapenaga uma, ni tagata i lo tatou atunuu e iai tomai ma agavaa faapea le poto masani i galuega tau televise mo le faatinoina o lea faamoemoe.
O se avanoa lelei tele lea mo nisi o le a filifilia e maua ai galuega ma selesele i ni faamanuiaga tau seleni i totogi a o galulue ai mo le pu’eina o lea polokalame. O le masina fou o Aukuso e taunuu ai le to’atele o le aufaigaluega mai Ausetalia ma tagata o le a auai i le pu’eina o le ata faasolo, ma amatalia ai le galuega lea ua faamoemoe e valu vaiaso o le a pu’eina ai.
O le tausaga e 2016 le taimi mulimuli sa pu’eina ai foi i Samoa se vaega o lea polokalame mai se fale televise i Amerika.
