A o tapena atu ai tagata o le faatuatuaga Mosalemi i Kalaiesetete mo le faailogaina o le fitu tausaga talu ona mavae le faalavelave mata’utia na fasiotia ai le to’a 51 o tagata o lenei faatuatuaga a o faia a latou tapua’iga i o latou malumalu e lua i le aai, ae o loo iai foi ma lagona mata’u i le amata ona toe alia’e mai lagona ita.
O le aso 15 o Mati i le 2019 na aga’i atu ai le alii Ausetalia o Brenton Tarrant ma tafana se’i tulou, tagata o lenei faatuatuaga i o latou malumalu tapua’i i le Al Noor Mosque ma Linwood Islamic Centre a o tatalo e faamanatu le Jumu’ah, o se tatalo sili ona tāua o le vaiaso.
E sili laitiiti atu lava i le 15 minute na gaioi ai lenei tagata faatupu faalavelave ae fasiotia ai le to’a 51 o tagata.
Ua 35 nei tausaga le matua o lea alii, o le masina o Mati 2020 sa ia ioeina ai rgona moliaga e 51 o le fasioti tagata faamoemoeina (murder), 40 moliaga o le taumafai e faaoo le oti (attempted murder) ma le moliaga e tasi o faiga faatupu faalavelave (terrorism), ma o Aokuso o le tausaga lava lea na faasalaina ai i le soloatoa i le falepuipui e aunoa ma se avanoa e palola ai.
Peita’i la o lea ua toe apili e lenei alii lona faasalaga ma le faai’uga a le faamasinoga i ona moliaga, ma e ono iai se avanoa e fai ai se faamatalaga tuufofoga a lenei alii mo se faamaoniga o lana apili, i le su’esu’ega faaletulafono na faia i maliu o tagata na ia fasiotia.
O lea ua fitu tausaga talu mai lenei faalavelave na faaigoa e le tama’ita’i Palemia sa iai o Niu Sila i lena taimi, Jacinda Ardern e faapea, o se tasi o ‘aso sili ona pogisa i le talafaasolopito o Niu Sila’, ae oo mai lava i le taimi lenei, o loo faavauvau pea nisi i le ogaoga o manu’aga o lagona ma mafaufau o loo faigatā pea ona faate’a ese i o latou mafaufau.
E tele lagona mafatia o loo faasoa ai le to’atele i mea na latou vaaia ma tofo totino iai i lea aso, aemaise lava i latou na faafuase’i ai ona motusia mafutaga ma ē pele.
O nisi o loo faaleo lagona mafatia i le taimi atoa sa faagasolo ai le faamasinoga o lenei faalavelave, ma e iai le talitonuga o nisi, o le toe taumafai o lenei tagata faatupu faalavelave e toe apili lona faasalaga, e una’ia mai se faanaunauga e mana’o e toe fai nisi faiga e faatauma’oi atili ai lagona o nai tagata na sao mai lea faalavelave ma aiga o i latou ua maliliu ma faamanu’alia.
O se tasi o matāupu o loo tulimata’ia e le atunuu atoa lona taualumaga poo fea o le a aga iai le faai’uga a le faamasinoga e tusa o le apili a lenei alii.
Puna o Faamatalaga: https://www.nzherald.co.nz/nz/muslims-fear-hate-rising-as-seventh-anniversary-of-christchurch-mosque-attack-approaches/EDWN2DOJDVEQZK44N6G7QEROXU/
