E 65 tausaga o se tamā matua mai le itumalo o Lefaga ua ioe nei i ona moliaga e 7 o le faia o amioga matagā i luma o le faamasinoga maualuga a le atunuu.
O lē ua molia sa avea ma faiaoga ua molia i le faia o ni uiga matagā i se teineititi laititi e la te nuu ma lolotu faatasi. Faailoa e lipoti a le Samoa Global ua to’atele teineiti laiti ua o latou faailoa le faia e lea tamā matua o uiga matagā ia i latou e pei o le kisi ma tagotago (se’i tulou).
Na faaulu atu le tali Ioe a Matualoto Petivia e tauala atu i lana loia ma ua tolopo e le afioga i le faamasino Fepuleai Ameperosa Roma lea mataupu mo le aso 24 o Iuni e lau ai le i’uga o lea tamā.
Ua faailoa mai e nisi o matai na tulai i luma o le faamasinoga ua mae’a ona faia se ifoga a lea tamā ma totogi foi le tupe i le nuu poo le faasalaga lea i le afioaga.
