O le alii na fana e leoleo i fafo ane o le faleoloa o le Woolworths i Matraville ua feta’ua’ina sa ia osofaia ni tamaitai se toalua.
Fai mai le 7news na valaau ane leoleo i le faalavelave lea i Matraville i le tea o le afa o le 4 i le afiafi ananafi ina ua maua atu lipoti o se alii o loo faaaupegaina i se naifi tulou ma o loo ia osofaia ni tamaitai se toalua.
Fai mai a o taumafai atu leoleo e pue le alii lea e 26 tausaga, na ia tali ane i leoleo ma faalala ane le naifi lea i le vaega o le kapaka a le supamaketi.
Fana ai loa e leoleo ma faaaoga le taser. Sa togafitia i lea nofoaga ma aveina atu ai i le falemai o St Vincent.
O loo faatalia nei le iuga o se suesuega ua faia e leoleo i le faalavelave ae ua ta’ua i isi lipoti o loo iai le popolega i le soifua o lea alii ona e foliga o le fanaina e leoleo o le vae lea e foliga mai ua aafia ai se uaua malosi ua ono lamatia ai ma le soifua.
O loo tālia se iuga o le suesuega a leoleo.
