Ua iai nei ni vaega tupe faaagaga faavavave ma nisi aiaiga fou ua faatulaga ina ia malupuipuia ai ma faaitiitia aafiaga o meaola poo manu papalagi mai le aafia i le faama’i o le foot and mouth lea ua maitauina le faateteleina i isi atunuu.
Fai mai lipoti i le asō mai le minisita o faato’aga a Ausetalia o Murray Watt ua unaia malosi nei le auaunaga a le vaega o le biosecuity ina ia silasila toto’a i itu tau le puipuiga ma le sao mai o le faama’i i le atunuu. Faamanatu e le minisita i le atunuu femalaga’i ina ia faaeteete lava i mea e malaga mai ma latou auā e ono sao mai ai siama o lea faama’i ma aafia ai meaola ma o le a aafia ai foi ma le fofoga taumafa i aano o manufasi.
O Bali lea o loo lipotia o loo matua’i tetele ai le foot and mouth ma ua faatulaga itu uma tau le puipuiga i malaevaalele ma tuaoi o le atunuu ia faamautinoa ai e lē o sao mai le faama’i. E 14 miliona ua folafola e le faigamalo a le Feterale fesoasoani ai i le taumafaiga lea e taofia le pepesi o le faama’i i Indonesia, Timor ma Papua Niu Kini. Fai mai le minisita o le mea e ao ona fai e lē gata ia puipui foi ma fesoasoani i le aufailafumanu ae faapea foi tagata uma o Ausetalia.
