O le faaiuga o lenei vaiaso ua faalauiloa ai se tasi o auala vave ma faigofie e faalauiloa ma faatau atu ai oloa eseese e pei o galuega taulima ma fua o faatoaga mai atiina a’e a le polokalame o tina mau paolo poo nofotane o loo taulamua ai le faalapotopotoga o le Toomaga mo ē Puapuagatia.
O le faatauina o ia oloa i le maketi i luga o fesoota’iga tau initaneti poo le maketi online, o se isi laasaga tāua lea ua see atu iai le polokalame e fesoasoani ai i tina o nuu ma afioaga o loo lotolotoi i le faiga o maketi a le Nofotane.
Ua mafai ona ausia lea auala o fesoota’iga faaonaponei e faatau ai a latou oloa ona o le lagolago a le Iuni o Europa ma le faalapotopotoga tuma’oti o le CSSP poo le Civil Society Support Programme, ma le Toomaga mo ē Puapuagatia.
Ua 15 maketi a lea polokalame i Upolu ae 3 i Savaii. O se avanoa tāua o le a maua ai seleni a tina mau paolo ma fesoasoani ai e unaia a latou taumafaiga i le gaosia o oloa taulima ma faatoaga e faatau atu ma fesoasoani ai i le atiina a’e oo latou aiga.
