E toatolu ni tagata ua pueina e leoleo i se faalavelave na tupu i le kapaka a le faleoloa a le K-Mart i Melepone ina ua feta’ua’ina le faafefeina o ni tamaitai se toalua i se fana ina ua osofaia se fale.

O se alii ma se tamaitai ma se tamaititi 17 tausaga na pueina e leoleo faaaupegaina i le itu i Matu o Melepone.

Fai mai molimau na faalogoina le pa mai o se fana ma sa vaaia foi le faaleagaina o se tasi o taavale a leoleo i le taimi na pue ai e leoleo i latou ia.

E talitonu leoleo o le taavale na malaga atu ai i latou ia o se taavale gaoi ma ina ua ulufale i latou ia i le fale sa osofaia na o latou faamata’u se tamaitai e 22 tausaga ma sosola ese ai ma le ki o le taavale a lea aiga ae fetaui ma le foi mai i le fale o le isi tamaitai e nofo ai i lea nofoaga e 38 tausaga ma fesagai ai ma le au solitulafono ia a o taumafai e gaoi le taavale.

Na faamata’u foi e le vaega lea si tamaitai sia i le fana ma sosola ese ai i le taavale. 

Ua maua e leoleo ma o loo feagai nei ma suesuega.