Ua faailoa e se tasi o selector poo i latou foi e filifilia tama taaalo a Kuiniselani mo le State of Origin, Darren Lockyer o loo matala pea le faitotoa mo le tama taalo o David Fifita e aofia ai i le Maroons pe afai ae toe foi i lona tulaga malosi e masani ona iai i le taaloga. 

O le faiaoga fou o le ‘au ua iai Billy Slater na ia faia suiga i le ‘au na iai i le tausaga talu ai ma le filifilia ai Fifita lea foi sa feagai ma manu’aga mai taaloga ua tuanai. 

Fai mai la Lockyer e lei faate’ia o ia i le lē filifilia o Fifita ae o loo matala pea le avanoa mo ia auā sa manu’a foi ma tatau ona toe maua lelei lona malosi e toe filifilia ai. O le taaloga muamua o le State of Origin o le tausaga nei e faia i le Aso Lulu o le vaiaso fou i le Accor Stadium i Sini.