E silia ma le 100 tama sa taaalo muamua i le lakapi faatasi ai ma se tasi sa taalo muamua i le All Blacks o Carl Hayman, ua o latou ave nei le World Rugby i le tulafono, ave faatasi ai ma totino tau lakapi i Egelani ma Uelese ona fai mai a latou o le lē mafai ona latou puipuia i latou mai manu’aga e mafua mai i concussions e tulai mai i le taimi na taaalo ai.

O le to’atele o tama taaalo i lea kulupu o loo aafia i le taimi nei i ni tulaga ua faaigoa i le faaperetania o le neurological impairment lea e aofia ai ma le vave maua i le dementia, epilepsy, Parkinson’s disease ma le motor neurone disease.

O loo tulai ai le Rylands Legal mo le kulupu lea ma ua o latou faailoa foi ua mae’a fesoota’i i tama taaalo e silia ma le 185 i latou sa taaalo muamua i le taaloga ma o le mataupu e lē gata i le tupe ae ia faia se faiga mo le faasaogalemuina o le taaloga ma ia mautinoa e faia siaki a tama taaalo ia faamautū ai e lē o aafia nisi mai aafiaga o le faaleagaina o le fai’ai.

E ta’ua i le lipoti o le mataupu lea e aupito i tele i le lalolagi ua faia i fafo mai o le malo tele o Amerika. O loo laga e tama taaalo i le mataupu lea tuua’iga e faapea o le lē lelei o sitepu poo auala sa faatulaga e totino sa puleaina taaloga e puipuia lelei ai tama taaalo ma e lei lava foi se a’oa’oina o tama taaalo i le mataupu e faatatau i le aafiaga tumau o le mafaufau ma lē mata’ituina lelei foi latou ma leai ni finagalo tau foma’i ma tagata popoto na sailia mo latou i ia taimi a o manunu’a ai mai le taaloga.