Ua lē fiafia leoleo ma ua amata aoao faamaoniga e mafai ai ona molia tagata tetee na o latou tapunia se vaega o le motorway a Aukilani i le Aso Toonai.
E silia ma le tasi afe i latou na savavali i luga o le State Highway i itu uma e lua i le solo tetee na tuufaatasia e le Freedom and Rights Coalition lea e lavea ai ma le ekalesia a le Destiny Church ma o le lē fiafia lava i le faigamalo o loo iai nei le fe’au na taumafai e momoli mai.
O faaupuga na tele ina faaleo mai e i latou nei, ua tatau ona o le Labour.
E ese mai i tagata savavali i luga o le motorway, sa faapea foi ona poloka e taavale a le autetee le isi itu o le motorway, ma sa matua’i faaalia ai le lē fiafia o le to’atele na umi ona poloka ai i le taulaga faapea auala fesoota’i ma le motorway ona o le tetee.
Sa auai ai foi ma le alii faifeau ia Brian Tamaki lea ua iloa i tetee sa faia muamua faasaga i le malo ma sā o le Koviti.
Ese mai i Aukilani, sa faia foi tetee o le fe’au lava lenei e tasi i Kalaiesetete ma Ueligitone, ma e tusa ma le 200 latou na auai ai.
E tuufaatasia tala fou e leai se isi ua molia, pau o lea o loo agai iai leoleo ona o le lē saogalemu ma solitulafono la latou mea na fai i luga o le motorway.
Ae mai le pulenuu o Aukilani, Phil Goff ua ia faatalosagaina le ave i le tulafono.
