O le asō e tulai ai i le faamasinoga se alii ma se tamaitai ua molia i le faalavelave na uma ai le ola o se tamaitiiti 2 tausaga i Riverina i Niu Sa Uelese i le tausaga talu ai.
O loo lipotia i le 9News i le asō o le aso 1 o Tesema 2023 na avatu ai le tamaitiiti lea 2 tausaga i le falemai i Griffith Base e iai manu’aga i ona ulu, na avane mulimuli ane i le falemai o tamaitii i Sini peitai na maliu i le aso 3 o Tesema i le tausaga lava na tea nei.
Ua ta’ua i le lipoti a o lei tāina le 11 i le taeao ananafi ae ua ulufale leoleo i se fale i le pitonuu lea o Griffith ma pueina ai loa se tamaitai 21 tausaga ma se alii e 33 tausaga le matua, ua molia faatasi uma ai i laua i le fasioti tagata paivalea e iai sootaga ma sauaga i totonu o aiga.
Ua ta’ua foi i le lipoti o le tamaitai sa molia foi i le faaoolima i se pepe i le masina o Novema o le tausaga talu ai.
E lē o mafai ona tatala i tua ma o loo faaauau pea suesuega a leoleo.
