Tusia : Maina Vai
E tolu tu’uaiga fa’asaga i le faipule filifilia o le itumalo o Fa’asalelelaga Numera 2 o Magele Sekati Fiaui o le vaega fa’aupufai a le Faatuatua i le Atua Samoa ua Tasi (FAST) O ia tu’uaiga e afua mai i le taimi o faiga palota i le masina o Aperila ma o le o lo’o talosaga (petitioner) fa’asaga ia Magele, o le afioga ia Gatoloaifaana Amataga Gidlow, lea sa avea ma sui faipule o le itumalo.
O tu’uaiga e aofia ai le taumafai e fa’atosina tagata ina ia palota ia te ia ma le fa’atinoina o nisi auala faasolitulafono ina ia maua ai le lagolago a tagata palota.
I le taualumaga o le mataupu i luma o le Fa’amasinoga ananafi, na molimau ai le alii o Fataloto Fealoa Fataloto fa’apea na tu’uina atu e le faipule ia te ia se vaega tupe e $50 ma le manaoga o le tina o Magele ina ia tautuana le palota a si ana tama.
Na tali iai Fataloto e “aua le popole ae ta’atia mai.” Na manino le molimau a Fataloto i le aofaiga o le tupe na ia maua i lea aso, peitai, ina ua fesiligia pe lanu a le tupe na ia maua, ae fenumiai lana tali ua le ia manatua.
Na maitauina le taumafai atu o loia a le itu talosaga ia Leiataualesa Jerry Brunt e fa’amantu ia Fataloto lanu eseese o tupe, peitai, na faigata i le molimau na tu’u mai se tali maoti ma le manino.
O le isi tu’uaiga ole faiga tausala a le ekalesia Katoliko sa fa’atino i le masina o Mati ae o lo’o loma le faiga palota, na savalia ai e le laulaufono a le ekalesia nisi o tagata mo se fesoasoani ma o se tasi o tagata sa latou o’o iai o Magele.
Na taua e le molimau na tali leleia latou e Magele ma o le a o’o atu i le po o le fiafia, peitai, na toe valaau atu Magele ua le saofia atu, ae o le a o’o atu le sui o lana komiti e sa’asa’a mo ia i lea po ma lafo se tupe.
Na faamaonia foi e le molimau na o’o atu lava le sui o le komiti ma le $600.00 ma o ia lea o le a taualuga ai le po, peitai, ina ua iloa e le sui o le komiti e $1000 le tupe na tatala ai le siva a se tasi o alo o le afioaga, o lea na fai ai loa le sui o le komiti e “tusi pepa ane le $400.00 e faaatoa ai le $1000 ae sei toe logo ia Magele e faauma ai lea vaega tupe.
Na tuliloa lea molimau e le loia a Magele le susuga ia Alex Su’a faapea, o le tupe lea na avatu e le sui o le Komiti, o le tupe lava a le sui ae le o se tupe a Magele.
E lei maluelue le molimau ae faapea mai o ia lava lea na o’o atu iai le sui o le komiti ma le faaupuga lea.
Peitai, ina ua toe tuliloaina mai e le Faamasinoga poo ai la na toe totogiina atu le $400 e fa’aatoa ai le $1000, na saunoa le molimau, o le sui lava o le komiti a Magele ae le o Magele.
Na fesiligia foi le molimau pe na savalia e le latou komiti lē o lo’o tagi ia Gatoloaifaana mo se fesoasoani, ae tali e leai.
Na fesiligia foi pe aisea, ae o le tali, “matou te lei mafaufauina e ō iai.”
E tolu molimau sa tutulai ananfi ma le isi toatolu lea o le a faagasolo i le asō ona mae’a ai lea o molimau a le itu talosaga, ma le faamoemoe e faagasolo molimau a le itu tagi i se taimi o le aso poo taeao foi.
