O le Aso Faraile na tea nei le aso 5 o Aperila na mae’a ai le avanoa na tuuina atu e le Faamasinoga o Fanua ma Suafa i aiga o Leauvaa o loo nofoia eleele o le nuu o Afega, e oese ai.
Peitai o le poloaiga lē tumau a le Faamasinoga Maualuga na tuuina mai i le aso 4 o le masina nei lava ua taofia ai le ono tulai mai o ni vesiga pe a mae’a le aso 5 o Aperila.
O loo faaalia i le poloaiga lē tumau le interim order i le gagana Peretania lea tulaga ma e faitauina faapenei:
“This order is intended to preserve the current position as between the parties and prevent irreparable harm possibly physical injury that may be caused by a mass eviction planned for 5th of April 2024, until this court has had the opportunity to consider the interim orders issues”.
O le amataga o le vaiaso nei, a lē o le Aso Gafua poo le Aso Lua e aumai ai le faaiuga a le Faamasinnoga Maualuga i finauga a loia a itu auai e faatatau i le talosaga a Leauvaa i poloaiga ua manaomia, ae faagasolo ai se iloiloga i le latou talosaga mo le toe lauliliuina e le Faamasinoga Maualuga o faaiuga a le Faamasinoga o Fanua ma Suafa e faasino i eleele o le nuu o Afega.
O le fesili tele o loo lotolotoi i lenei finauga pe o toe umia e le Faamasinoga Sili a le atunuu ni malosiaga faaletulafono e faavae e toe tagofia ai ni mataupu a le Faamasinoga o Fanua ma Suafa, lea ua maioio ona ta vavae i teuteuga o le faavae na pasia e le Palemene i le tausaga e 2020.
