O le koneseti a o tatou tagata talenia i le musika sa sa’ili seleni ai mo le tausia o o tatou matua tausi i Mapuifagalele, faapea foi ona fesoasoani ai i Tamaitai Sa Monike i Samoa ma Aukilani i Niu Sila, o lea ua suia i se posiva e faia i le Aso Faraile nei i le Fale Samoa i le aai i Magele Niu Sila.
Ua faaalia e le pule faatonu o le kamupani o le Pacificezy o se tasi o lagolago malosi i lea faamoemoe, le afioga Peseta Faimalotoa Allan Stowers, ua lima nei tausaga o faia lea fesoasoani faasamaria agalelei.
O le tausaga na te’a nei e limasefululima afe na maua ai, lea na faameaalofa ai i Mapuifagalele ma le nofoaga o Monike i Samoa le ta’i 25 afe tala, ae lima afe le seleni na faameaalofa i Tamaitai Sa Monike i Aukilani Niu Sila.
O le tausaga nei ua lē faia se koneseti o musika sa masani ai, ae ua suia i le posiva e pei ona valaaulia ai asosi ma mafutaga eseese i Niu Sila e pei o tama ma teine tuai o le Malisi ma le SMOGA, o le ACOPA, SCOPA ma isi lava mafutaga.
O loo valaaulia ai foi le afioga i le Konesula o Samoa i Aukilani faapea le Komesina o fefaataua’iga a Samoa i totonu o Aotearoa.
O i latou uma o le a agalelei i le faamoemoe o le posiva i le Aso Faraile nei, o le latou meaalofa tāua lea o lenei Kerisimasi mo Tamaitai Sa Monike ma o tatou tinā ma tamā matutua o loo tausia e Tamaitai Sa i Mapuifagalele.
