Ua iai lipoti ua taua ai le pueina e leoleo o se tamaitai i Korea i Saute ina ua mae’a ona maua tino maliliu o tamaiti e toalua i atopau i Aukilani e pei ona faailoa atu i talafou i le taimi ua sola.
Fai mai le One News na pue e leoleo i Korea i Saute le tamaitai lea 42 tausaga ona o le mataupu lea, lipotia e le aufaasalalau i lea atunuu na maua ai e leoleo lea tamaitai fai mai sa lafi i se fale i le aai o Ulsan.
Fai mai ua talosaga leoleo ina ia toe aumaia lea tamaitai i Niu Sia nei e faia ai ona moliaga. O le faia atu o le talosaga a leoleo Niu Sila i le faamasinoga i Korea ua faia ai lea poloaiga e pueina le tamaitai.
O tino maliliu na maua i totonu o atopau tulou na manumalo ai se aiga i le faatautu’i i le masina o Aokuso. O loo galulue nei la leoleo i isi suesuega ina ia faamae’a lelei lenei mataupu.
