Ua toe foi i le pito i luga o le taamilosaga le ‘au a le Northern Mystics i le taamilosaga a le ANZ Netball Premiership o loo faagasolo, ina ua faia’ina ai le Waikato Bay of Plenty Magic i lea taaloga mataina i Aukilani i le aso ananafi, o ‘ai o le taaloga 60-49.

Na taaalo foi talu ai ‘au ia e lua ma sa tofu ma le malo ia la taaloga e lua na faia.

I le ‘au a le Mystics e toatele nisi teine taaalo e lei auai e pei o le kapeteni, Sulu Fitzpatrick, Tayla Earle ma Monica Falkner.

Ua atoa ai foi i le taaloga lea le 100 o taaloga a le skipper a le Magic, Ameliaranne Ekenasio.

E toe taaalo foi la le Mystics ma le Northern Star i le afiafi nanei ae o le Magic lea ua see ane i le tulaga lima ae o le ‘au a le Tactix lea ua see ane i le tulaga lua, e fitu ana malo mai taaloga e 9.