Ua atoa i le vaiaso nei le 14 tausaga talu ona lē toe faamamaluina e Samoa le aso malōlō mo le Anzac Day e pei ona masani ai i tausaga e 40 ua tuana’i, o se tulaga ua tagatagai ai le Asosi e talafeauga ona toe faia lea aso malōlō.
O lenei aso faapitoa e manatua ai fitafita na maliliu i le taua ma e faamamalu e le tele o atunuu i le lalolagi i le Aso 25 o Aperila i tausaga uma. Mo Samoa lava ia i le tausaga nei sa faia se sauniga faapitoa i lalo o le uati tele i le taulaga na auai ai na’o i latou na valaaulia ona o puipuiga o le pepesi o le faama’i i le atunuu.
Faalia e le Peresetene o le Asosi o Fitafita Samoa o le Sui Palemia foi lea, le afioga Tuala Tevaga Ponifasio o le toe faia ai o se aso malōlō mo Samoa e tatau ona tapena lelei iai se finagalo o le Asosi poo le Returned Services Association (RSA) e tuu atu luma o le Kapeneta aemaise o le sailia o le finagalo o le au faipisinisi.
“E pei ona silafia o lenei aso malolo sa aveeseina ma faalētulafonoina lea ua mafua ai ona lē toe faamamaluina le aso o le Anzac, o le naunautaiga lava i le matou faalapotopotoga o le RSA ina ia toe maua e le atunuu lea aso malolo ia faamamalu ai le taua o lea aso. E pei ona outou faafofoga mai e le gata o fitafita i fafo a’o fitafita foi o le atunuu, o alo ma fanau na auai atu i le taua lea ua maliliu. O le aso foi la lea e patino iai tatou i Samoa e lē na’o Niu Sila ma Ausetalia ma le lalolagi”.
Taua foi e Tuala o le taimi lenei e le’o iai ni talanoaga aloaia mo se aso malolo ona o le manatu o loo iai pea Samoa i tulaga o vavao o le Koviti-19 ma e ave pea le faamuamua i le saogalemu o le mamalu o le atunuu.
