O le Minisita lagolago o le Matagaluega o Puna’oa Faalenatura ma Siosiomaga le afioga Faleomavaega Titimaea Tafua, na fai ma sui o le malo i le sainia o le maliega e faatū ai se nofoaga tutotonu e tapuvae tasi iai tonu fai mo le puipuia ma le faasaoina o togatogo, o ni laau e tāua tele mo le ola faalenatura o i’a ma isi meaola o le sami.
Ua faailoa i se pepa o faamatalaga faalaua’itele o se taimi muamua lea ua sainia ai se maliega i le va o atunuu i le faamoemoe e avea lea nofoaga tutotonu e faasoa ma fetufaa’i ai sui o malo e 27 e aofia ai Samoa i fuafuaga ma polokalame e puipuia lelei ai togatogo.
E pei ona silafia o se tasi lea o vaega tāua o le siosiomaga o le gataifale sa asia e le Tupu o Peletania a o iai i Samoa talu ai nei ma lana Masiofo i le asiasiga taualoa i lo tatou atunuu ma le auai i le Fono a Malo o le Taupulega.
O le Minisita lagolago o le matagaluega o puna’oa faalenatura ma siosiomaga sa fai ma sui o Samoa i se fono tau i mataupu o puipuiga o le siosiomaga sa usuia i le atunuu o Saina i le vaiaso muamua o le masina nei o Novema.
