O togiga a a’oga o loo laei e alo ma fanau a le atunuu, o loo faailoa ai le a’oga o loo a’oa’oina ai, ma o loo ta’u atu ai foi ma o latou mātua ma nuu o loo nonofo ai.
O faai’uga ua faia e faia’oga i fanau ua latou soli ta’iala ma tulafono o loo faatonutonu ai a’oga, ua lagolagoina e le Minisita o A’oga ma Aganuu, le afioga Aiono Alec Ekeroma e pei ona faailoa sona finagalo i upega tafa’ilagi e tali ai fesili ua oo atu ia te ia.
O se tasi o fesili poo le ā sana gaioiga i fanau a se tasi o a’oga a le malo ma se kolisi maualuga a se ekalesia i le taulaga o Apia ua toe aafia i le faatupuina o ni vevesi i le tuua o a’oga.
E lē fou le tula’i mai o ia vevesi ae o le toe aliali mai o vesiga i le va o nisi o fanau a’oga a le Kolisi o Maluafou ma le Kolisi o Leifiifi ae e le’i atoa se masina talu ona toe a’e a’oga mo lenei tausaga fou, ua faailoa ai i se lipoti le tutuli ma faamālōlō lē tumau o ni fanau e to’a 22 a le Kolisi o Leiififi.
O ia fanau ua iai le talitonuga sa aafia i vevesi na aliali mai i le nofoaga faatali pasi i Savalalo i le tuua o a’oga i le Aso Faraile na te’a nei.
Ua faaalia ai e le Minisita o A’oga ma Aganuu lona lagolagoina o le faai’uga ua faia e le pule a’oga o le kolisi o Leifiifi i le faatino o lona tiute.
Ua faaalia foi e le Minisita e iai lona lagona o le faai’uga foi lea o le a faia e le pule o le Kolisi o Maluafou.
O ata video sa pu’eina e nisi sa salalau i luga o fesoota’iga o le api o foliga sa vaaia ai lea vevesi i le va o nisi o fanau mai ia kolisi e lua.
