Ua malie le kamupani vaalele a le Qantas i se vaegatupe e $105 miliona Ausetalia e faamuta ai feutana’iga i le matāupu na ave ai i le faamasinoga e ni tagata ona o credits o faigāmalaga i le vaitau o le pepesi o le koviti.
Faailoa i le 9News i le asō o lea aofa’iga o loo faatalia le ioega mai le Federal Court of Australia.
O le matāupu na ave to’atele i le faamasinoga, class action ona o faigāmalaga na fuafua e faia i le amataga o le tausaga ia Ianuari 2020 ma Novema 2022, faigāmalaga fai mai na faalēaogāina e le Qantas.
Saunoa ai la se sui mai le ofisa o le Echo Law, Andrew Paul i le lipoti e faapea o le faai’uga e faia i le asō e tuuina ai le taui i lima o le faitau afe o paaga a le Qantas.
I lalo la o le maliega ua faia ua agavaa ai paaga e sa’ili taui mai le kamupani vaalele.
O le a totogi ane e le kamupani vaegatupe e ioeina mai i le faamasinoga e tusa o lea matāupu ma o le ‘afa muamua o le tausaga fou 2027 ua fuafua e tatau ona oo iai ua maua ia tulaga.
Puna o Faamatalaga: https://www.9news.com.au/national/qantas-settles-covid-class-action-for-105-million-dollars/5328147d-ccf8-4e0b-8af7-a5ff6622fd89
