O le American Corner o se nofoaga ua avea ma tulimanu o se fesoasoani a le malo o Amerika e aga’i iai fanau a le atunuu e sa’ili’ili i le poto salalau ma una’ia ai le faitautusi.
O le faletusi faamanatu o Nelesoni i le taulaga o Apia ua iai lea nofoaga ua faatotoga i tusi faitau ma tusi mo su’esu’ega a fanau a’oga o le atunuu, o se lagolago a le malo o Amerika i le a’oa’oina o fanau a Samoa.
O le afea o le atunuu e le Sui Failautusi o le va i fafo o lea malo, na ia tatala ai le toe fetuuna’iga o lea nofoaga ua siitia i le vaega o le fogafale i lalo o lea faletusi.
Sa auai nisi o fanau o loo a’oa’oina i le a’oga tulagalua o le Amosa o Savavau sa latou molimauina le lava saunia o lea nofoaga mo i latou auā a latou sa’ili’iliga i matāupu o loo a’oa’oina aemaise o tusi faitau mo le faaaogāina i soo se taimi.
O le sui ofisa sili o le matāgaluega o a’oga ma aganuu le faletua le afioga Tuaopepe Perenise Tinei sa avea ma sui o le malo e faafetaia le malo o Amerika mo lea fesoasoani tāua auā le a’oa’oina o fanau lalovaoa a le atunuu.
E pei ona silafia o se tasi o fesoasoani malosi a Amerika i le atina’e o a’oa’oga o alii ma tama’ita’i pisikoa o loo faia’oga i nisi o a’oga tulagalua ma a’oga maualuluga i Samoa.
