Ua unaia le taaloga o le Lotto ia faataatia ese ana fuafuaga e faalauiloa se Online Bingo ona o le a faateleina ai tulaga e ono aafia ai le toatele i taaloga faitupe i komiuniti a Maoli ma le Pasefika.
Lipotia e le Herald i le vaiaso nei le mataupu lea ma ua faailoa ai le fuafua o le Lotto e faailoa le Online Bingo lea i le amataga o le tausaga fou ma ua mae’a tuuina le talosaga i le minisita o mataupu faalotoifale ma le faamoemoe e maua ai se vaega tupe faaopoopo e oo atu i le 25 miliona i le tausaga muamua o le taaloga.
Peitai la ua taua i le lipoti o le faatonu o le AUT Gambling Addictions Research Centre Maria Bellringer ma se sui o le fono faufautua a le Lotto o loo mananao e faatatia ese lea fuafuaga. O loo faatalia la le faaiuga i lea mataupu.
