Fana e leoleo se alii i Fielding i le mae’a o se taimi umi na o latou faataututu ai i Fielding lava i Manawatu.

Fai mai leoleo na valaau ane i latou i le fale lea i Seddon Street a o lei ta le tasi i le aoauli ananafi ona o lipoti o se fana o loo faalogoina le pa’ō ane ma e foliga o loo fana agai i le faamalama a le aiga tuaoi. 

E taunuu atu leoleo e lē fia sau i fafo le tagata mai le tuatusi lea e talanoa i leoleo.

Na agai ane iai ma le vaega faapitoa a leoleo i tulaga faapea atoa ma leoleo faaaupegaina.

Fai mai e tea le 9 i le po anapo ae fana loa e leoleo le tagata lea ma maliu ai a o aveina atu i le falemai.

O loo faatalia se isi lipoti lata mai o le mataupu ae ua logoina foi le vaega tutoatasi a leoleo mo suesuega, le Independent Police Conduct Authority.